ESTUDO SOBRE OS VIVEIROS EMPRESARIAIS GALEGOS

Os viveiros empresariais galegos xeran arredor de 3.000 empregos, segundo un estudo da Consellería de Traballo

O director xeral de Promoción do Emprego, Andrés Hermida, presentou hoxe este documento, xunto cos autores do mesmo

Trátase do primeiro estudo destas características a nivel autonómico e nacional

A taxa de éxito dos emprendedores que participan nos viveiros de empresas é do 90 por cento

Actualmente, hai 22 viveiros totalmente operativos en Galicia, aos que hai que sumar outros 10 que se porán en funcionamento nun breve prazo de tempo.

Os negocios que se desenvolven ao abeiro dos viveiros de empresa en Galicia xeran uns 3.000 postos de emprego directos, aos que habería que sumar os de carácter indirecto. Actualmente, hai funcionando en Galicia un total de 22 viveiros totalmente operativos, aos que se sumarán outros 10 que se porán en funcionamento nun prazo breve de tempo.

Así o conclúe un estudo da Consellería de Traballo e Benestar, un traballo pioneiro a nivel autonómico e nacional xa que non existe ningún outro destas características. O director xeral de promoción do emprego, Andrés Hermida, presentou hoxe este traballo, elaborado polos profesores Francisco Ferreiro; da USC, e polo profesor da Universidade de Vigo, Alberto Vaquero.

O traballo, que foi financiado polo departamento autonómico, ten como obxectivo coñecer as características dos viveiros galegos, analizar o perfil emprendedor e a actividade predominantes nos mesmos, así como avaliar a súa creación de emprego.

Con respecto a este último punto, o estudo recolle que máis de 880 actividades empresariais se desenvolveron nos viveiros galegos ata 2009, predominando aquelas de natureza científica e técnica. Ademais, segundo datos de 2009, estas actividades existentes no momento, ou xa saídas dos viveiros galegos, xeraban 3.000 empregos directos.

Ademais, o documento amosa que a taxa de éxito dos emprendedores galegos nestes viveiros é do 90 por cento, un dato destacable na situación actual na que moitas empresas teñen que desaparecer nos seus primeiros catro anos de andadura.

Hai que ter en conta, ademais, que aos 22 viveiros actualmente operativos, habería que sumar os outros 10 que se porán en marcha en breve, ou ben que están en proxecto, nas seguintes localidades: Oleiros, Narón, As Pontes, Santiago (orientado á I+D+i, tecnoloxía e apoio aos oficios), Guitiriz, na comarca de Lemos, Burela, Viveiro, Barco de Valdeorras, e Pontevedra.

En canto á utilidade destes iniciativas, cabería destacar que os 20.500 metros cadrados de instalacións dos que dispoñen os viveiros de empresas en Galicia permiten que os emprendedores teñan á súa disposición un conxunto axeitado de recursos, físicos e humanos, para levar a cabo o seu proxecto durante un período de entre 2 e 5 anos.

O espazo temporal está delimitado porque o obxectivo do viveiro é servir como “punto de partida” da actividade no seu momento “máis crítico”, que é o comezo. De aí a importancia da oferta de servizos intanxibles neste proxectos, xa que os emprendedores contan cun “bo asesoramento” impartido por profesionais.

Así, por exemplo, o 81 por cento dos emprendedores galegos instalados nos viveiros conseguiron unha subvención que, rexidas por criterios obxectivos, valoran especialmente a viabilidade dos proxectos e a súa capacidade para crear emprego.

Polo último e ante os datos do estudo, o director xeral de Promoción de Emprego sinalou que a Xunta de Galicia continuará apostando polos viveiros de empresas e polo apoio ao emprendemento como instrumentos para mellorar a situación económica e dinamizar o emprego na comunidade autónoma.

Data:13-01-2011

Fonte:Consellería de Traballo e Benestar.